Rabiye Ana Mektiwi Jumhurriyet Bayrimini Tebriklep Paaliyet Élip Bardi


Mushu ayning 15-küni Sherqiytürkistan Birliki Teshkilati terkiwide 2008-yili 6-ayda Gérmaniyede qurulghan Rabiye Ana Mektiwining teshkillishi we 50 ke yéqin chong kichik méhmanlarning ishtirak qilishi bilen Jumhuriyet bayrimimiz tebriklendi.

Wetenperwer Sherqiytürkistan xelqi 1930-yillarda we 1940-yillarda Xitay tajawuzchillirining milliy zulumigha qarshi qozghulup, 1933-yili 11-Ayning 12-küni „Sherqiy Türkistan Islam Jumhurriyiti“ni, 1944-yili 11-Ayning 12-küni „Sherqiy Türkistan Jumhurriyiti“ni qurup dunyagha jakarlighanidi.


Shu seweptin xelqimiz her yili 11-Ayning 12-küni Sherqiyturkistan xelqining 20-esir ichide zulumgha qarshi oyghunup, ikki qétim Jumhuriyet qurup, özlirining milliy mewjutluqini dunyagha jakarlighan qutluq bir kün süpitide qutluqlap, özlirining erkinlik we hörriyetke bolghan ottek intilishini ipadilep kelmekte.





Ejdatlirimiz Xitay tajawuzchillirining millitimizni qul qilishigha qarshi 1930- we 1940-yillarda qehrimanliq bilen küresh qilip, musteqil hakimiyitini qurup chiqip, dunyagha özlirining milly jasaritini qaytidin namayan qilghanidi. Öz Jumhuriyetlirimiz höküm sürgen u yillar millitimiz düshmen milletlerning kemsitishi, xorlushi we milliy boyunturiqidin qurtulup, erkin bir nepes alghan, höriyet we musteqilliqning temini tétighan, ata-bowillirimizdin miras qalghan qehrimanliq jasaritidin yétishiche hozurlanghan bir dewir bolghanidi.

Sherqiytürkistan Jumhuriyetlirini ichkiy-tashqiy düshmenler we arimizdin chiqqan milliy munapiqlar til biriktüriwélip aghduriwettuq dep yürgen bolsimu, U ikki Jumhurriyet hala bügünki künge qeder xelqimizning qelib töride xuddi külning astidiki choghdek yélinjap, milliy dölitimizni qaytidin qurup chiqish herkitimizge hayatiy küch béghishlap kelmekte.

Rabiye Ana Mektiwi xelqimizning zulumgha, qul qilinishqa qarshi tik baqalaydighan shereplik küresh enenisini barghanche küchlendürüsh, teshkilat ezalirigha bolupmu yash-ösmürlirimizge milliy döletning, erkinlik we höriyetning menisini téximu hés qildurush, we ulardiki milletperwerlik, wetenperwerlik iddiysini téximu küchlendürüsh sewebidin Jumhurriyet bayrimiliq bu paaliyetni intayin tertiplik, mol mezmunluq we renggareng oyushturdi.

Paaliyet barliq paaliyet ishtrakchillirining yüksek ihtram bilen ayaqta turish halitide mustemlike astida turiwatqan Sherqiytürkistan Jumhuriyitining Döletshiéri bilen bashlandi.Sherqiytürkistanning Ay-yultuzluq kök bayriqi 10 métirliq tik xada arqiliq Gérmaniye asminida erkin lepildidi. Döletshiéri orunliniwatqanda paaliyet ishtrakchillirining kirpikliri yash bilen nemdeldi.

Sherqiytürkistan Jumhuriyitining Döletshiéri axirlashqandin kéyin Teshkilat Reyisi Korash Atahan ayrim-ayrim halda paaliyet qatnashquchillirining Jumhuriyet bayrimini tebriklidi we hemmeylen resmiy bir shekilde öz-ara Jumhurriyet bayramlirini tebrikleshti. Öz-ara tebriklesh axirlashqandin kéyin Korash Atahan yene échilish nutiqi sözlep, milliy rehbirimiz Rabiye Qadérning paaliyet ehlige yollighan salimini yetküzdi we Jumhurriyet tariximiz, weten-ichi we siritidiki milliy herkitimizning tereqqiyati we Rabiye Ana Mektiwining bundin kéyinki paaliyetliri heqqidiki pilanliri we mektepning sherqiytürkistanliq yash-ösmürlerdin kütidighanlirini otturgha qoydi.

Bu paaliyetning bayram keypiyatini téximu yoquri kötürüsh üchün Ata-Anilar we perzentler Edebiyat-senet, Örpi-adet, Diniy étiqat we Ilim-penge ayit renggareng nomérlirini teyyarlap körsetti. Paaliyet axirida, Rabiye Ana Mektiwining namida her türlük nomérlarni orunlighan kichik dostlar alahide xatire boyumliri arqiliq mukapatlandi. Mukapat teriqiside bérilgen xatére boyumlar ichide Sherqiytürkistanning dölet bayriqi, döletshiéri, oqush quralliri we qiziqiraliq zéhin sinash oyunchuqliri bar.

Bu paaliyetning meniwiy hayatimizni janlandurush, perzentlirimizni bashqilargha tartturup qoymasliq, til.yéziq we kultural alahidiliklirimizni qoghdap qélish tereplerdiki ehmiyiti intayin küchlük bolghachqa, teshkilatimizning ezaliri Ayile boyiche aktipliq we qizghinliq bilen qatnashti.Bu paaliyet 2008-yili 11-Ayning15-Küni yeni dem élish künige toghrilanghan bolup, Saet Gérmaniye waqti 12:00 din 19:00 giche dawam qildi.

Sherqiytürkistan Birliki Teshkilati Teshwiqat Merkizi